NI TAMU ILA NI SUMU

Ujumbe Unatoka: Ayubu 20:12-13, 27

Ingawa UOVU una tamu kinywani mwake, Ingawa auficha chini ya ulimi wake, Ingawa auhurumia, asikubali kuuacha uende zake, Lakini akaushika vivyo kinywani mwake….. Mbingu zitafunua wazi uovu wake, Nayo inchi itainuka kinyume chake. 

TAFAKARI:

 Ni hali ya kawaida katika ulimwengu wa maendeleo kuona vidonge hasa vya kutibu malaria kuona vimepakwa radha ya sukari kwa nje, lakini kwa ndani ni chungu ajabu. Siku moja niliona mtoto akilia baada ya kutafuna kidonge aina ya Comaquine ambacho alipolamba akaona ni kitamu akafikiri Pipi, baada ya kutafuna ndipo akakutana na Uchungu.  Ndivyo ilivyo kwa mitego ya panya, wengi wanaweka SUMU ndani ya Mchuzi wa Samaki au nyama, panya anapokula anasikia Utamu mpaka kwenye Kisogo, lakini baada ya muda mfupi utakuta amekufa bila matumaini.

Wewe kijana na rafiki yangu unayesoma tafakari ya leo, nataka nikuambie kuwa dhambi ni tamu lakini ndani yake Adui ameweka Sumu ambayo ni lazima itemize kusudi lake. Piga picha siku ulipokutana na huyo boy friend au girl friend wako, ukalegeza macho na kutamka neno “Honey / Sweet I LOVE YOU”  ulijisikiaje? Na hatimaye utakuta taratibu lakini kwa uhakika wanakokotana hadi wanaingia katika Dhambi ya Zinaa. Wengi hawapendi kuvunja Amri ya Mungu inayosema “USIZINI”, lakini kwa hila za shetani anawaangusha. Tendo la Ndoa nje ya Ndoa halali ni Dhambi ya Zinaa, hiyo ni sukari iliyotiwa sumu ya kufisha, inaua taratibu lakini kwa uhakika.  

Kijana mmoja aliyenusulika kufa akiwa amekunywa sumu ya panya akitaka kujiua baada ya kugundua ameambukizwa Virusi vya ukimwi, tulipomuuliza ilikuwaje? Akasema rafiki yangu wa kiume alinilazimisha kufanya naye ngono, siku moja alimtembelea boy friend wake, chumba chenyewe ni kimoja na viti ni kitanda, alipoingia, kwa maneno ya kubembeleza wakajikuta wamefika kwenye “Point of No Return” wakavunja AMRI sa saba, ndivyo vijana wengi walivyoanguka bila kutarajia na wanabaki wakisema “NINGEJUA” lakini wanakuwa wamechelewa.

Neno linasema, Dhambi ni TAMU na wengi wanajitahidi KUIFICHA ili wasigundulike, wasije wakaicha, Lakini Mungu anasema; Mbingu zitaifunua na  itawekwa wazi. Popote unapokuwa, iwe Guest House, Chumbani, kwenye vichochoro, hata iwe usiku wa GIZA nene, chochote unachofanya, Kamera ya Mbinguni inakumulika na kuchukuwa Picha, chicho la BWANA liko kila mahali likichunguza kila tendo – na mwisho anasema ATAUFUNUA UOVU HUO.

MUNGU ANATUFUTA VIJANA KAMA AKINA DANIEL KATIKA KIZAZI CHA LEO WATAKAOSIMAMA KWA UAMINIFU – KWA NINI USIWE WEWE?

SIKU YA LEO IKAWE YA BARAKA NA USHINDI TELE

Ev:  Eliezer Mwangosi.

Masomo zaidi:  http://emwangosi.blogspot.com/ (VIJANA) http://kayanafamilia.blogspot.com/ (NDOA) http://matengenezo.blogspot.com/ (UKWELI ULIOFICHIKA NA KUUKULIA WOKOVU)

MSIYACHOCHEE MAPENZI

Ujumbe unatoka:  Wimbo ulio bora 2:7 

“Nawasihi, enyi binti  za Yerusalemu, kwa paa na kwa ayala wa porini, msiyachochee mapenzi, wala kuyaamsha, Hata yatakapoona vema yenyewe”

TAFAKARI:

Kama kuna janga la HATARI ambalo jamii ilipaswa kulitangaza kwa siku za leo, ni Vijana kujihusisha na mapenzi kwa wakati usioruhusu. Katika tafakari za nyuma niliwahi kutoa somo la “Kila jambo lina wakati wake”. Swala la Mapenzi katika kizazi chetu limekuwa tishio, Kuna dada mmoja ambaye alikatisha masomo ya chuo kikuu kwa kuvurugikiwa na akili, kwa sababu ya mawazo mengi baada ya kuachwa na BOYFRIEND wake, hadi leo yuko nyumbani kama zezeta.

Mapenzi ni Moto ambao ukichochewa sio rahisi kuuzima mpaka utimize kusudi lake la kuteketeza, Mapenzi yanalewesha na kupiga upofu, ukinaswa na Upendo – Mtu Kipofu utaona ana makengengeza, Mwenye mapengo unaona ana Mwanya, yaani ukipenda hutaona Kasoro. Neno linasema “UPENDO una nguvu kama Mauti … Ni kama MOTO ambao hakuna maji yanayoweza KUUZIMA” Wimbo ulio bora 8:6-7. Ndio maana utakuta kijana anaogelea kwa Bibi kikongwe, hebu jaribu kumwambia huyo hakufai, atakuwa tayari kujiua, make yeye anamuona ni Binti wa Umri under eighteen.    

Ushauri wangu kwa Vijana ni Huu – Mungu ameweka Upendo ndani ya Mtu kwa makusudi ya KUDUMU, sio wa kuishia njiani au kuvunjika. Hivyo kabla hujaingia katika mahusiano ya Mapenzi na Mtu yeyote Mwambie Mungu akupatie the “Right Person at the Right Time”. Jamii yetu inaendelea kuathirika kwa ongezeko la Vijana wenye Misongo, inayotokana na vurugu za Mapenzi yasiyo na mpangilio. Shetani amefanikiwa kuteka vijana wengi – akiwatilia Sumu kwenye Sukali ya Mapenzi hata hawasikii ushauri.

Biblia inasema Ngono nje ya Ndoa ni UZINZI NA UASHERATI. Vijana asilimia kubwa wameziba masikio wasisikie neno la Mungu, naye Mungu anaziba masikio asisikie vilio vyao [Isaya 59:1-2] wanapokuwa wametelekezwa na matapeli wa Mapenzi. Bado Mungu anawataka vijana wafanye uamuzi upya wa kusimama Upande wake ili awapatie RAHA nafsini mwao sasa na hata Milele. 

VIJANA NAWAKIA SIKU NJEMA – MUNGU AWABARIKI NA KUWAPA AMANI

Ev. Eliezer Mwangosi

UJANA NI MAUA

NENO LA LEO:  Ayubu 14:1-2

“Mwanadamu aliyezaliwa na mwanamke, siku zake za kuishi si nyingi, naye hujaa taabu. Yeye huchanua kama vile UA, kisha hukatwa; hukimbia kama kivuli, wala hakai kamwe”

TAFAKARI:

Rafiki! Leo tunatafakari juu ya UA, wote tunajua kuwa UA LIKICHANUA KINACHOFUATA NI KUNYAUKA, na Jambo la kuvutia zaidi ni kuona linavyopendeza na kuvutia, mbali na wanadamu kupenda MAUA, hata wadudu pia utakuta wamejazana.

Maisha ya Mwanadamu ndivyo yalivyo, kama UA linavyonyauka ghafla ndivyo maisha yanavyokatika, kumbuka sisi sote ni marehemu watarajiwa wasiojua muda wa kifo.

Vijana! Mwisho wa UA kuchanua ni kunyauka, wengi huutumia wakati huo vibaya, HAWATULII, Utakuta Binti mzuri eti anajirusha na Libaba ambalo halina Mpango wa kumuoa ili mradi ana Vijisenti – Hao ni WADUDU WAHARIBIFU. Tunaona baadhi ya MAUA yanavyoharibiwa na wadudu waharibifu, yanatobolewa na kuchafuliwa, ndivyo vijana WANAVYOPOTEZEWA DIRA YA MAISHA. Akili zikiwarudia na kutaka Kuolewa au kuoa wanajikuta wamechelewa – UMRI WA KUCHANUA UMEPITA, hata wakitumia MAKE UP, hazisaidii, wadudu wote wamekimbilia maua mengine yanayochanua.

Vijana! Habari za ku “PASS TIME” na vija wenzenu kwa maisha ya Ngono, Ulevi, Muziki n.k. yanawapotezea DIRA ya Maisha, tumeshuhudia wengi wanasukumwa na TAMAA, na  Wengi wanatumika kama VYOMBO vya kukidhi tama za wengine, mwisho wake ni kuachwa kwenye Mataa. MAISHA YOYOTE YA DHAMBI NI TANZI YA UHARIBIFU.

VIJANA WENGI WANAJUTIA KWA YALIYOPITA NA WENGINE NDIO WAMEZAMA.

SULUHISHO NI KUMTEGEMEA MUNGU – KWAKE YOTE YANAWEZEKANA

NAWATAKIA SIKU NJEMA NA WEEK END NJEMA YENYE BARAKA TELE

Ev. Eliezer Mwangosi

SAMAKI AWA ATM

NENO LA LEO:  Mathayo 17:27

“Lakini tusije tukawakwaza, enenda baharini ukatupe ndoana, ukatwae samaki yule azukae kwanza; na ukifumbua mdomo wake utaona shekeli (Fedha); ichukue hiyo ukawape kwa ajili yangu na kwa ajili yako”

TAFAKARI:

Watu wengi leo wanajiingiza katika vitendo vya uasi juu ya Mungu kwa sababu ya Maisha, tunaona: Ufisadi, Rushwa mpaka rushwa za Ngono, Ukahaba, Uongo n.k. ni sehemu ya maisha ya walio wengi. Wengi wako tayari wadhalilishwe ili mradi mkono uingie kinywani. Wapendwa Mungu yupo kwa ajili yetu, kwake hakuna lisilowezekana, wanaume wengi siku hizi wanasumbua mabinti na KADI  ZA ATM !  Angalia kisa cha Yesu akidaiwa Kodi, alimfanya SAMAKI kuwa ATM na Ndoano kuwa KADI ya kutoa Fedha (Shekeli), atashindwaje kukupatia mahitaji yako? Una jambo gani Gumu linalokusumbua? Mwambie Mungu hakuna asiloliweza.

Wapendwa tunaishi nyakati za Mwisho, siku za hivi karibuni kumezuka mjadala juu ya serikali yetu ya Tanzania kutofautiana na serikali ya Uingereza, baada ya kumkataa Balozi ambaye ameoa Mwanamume mwenzie. Swali kwa wengi ni hili, je ni kweli tutaweza kushinda vikwazo vya nchi tunazozitegemea? Mara zote katika maisha ni hatari kuishi maisha tegemezi, bila Mungu kuingilia kati juu ya jambo hili, sio rahisi kushinda mtego huu wa Shetani.

Ushauri wangu ni huu, pamoja na maamuzi yote tunayoyachukuwa kutetea maadili yetu, tunapaswa kuchukuwa hatua ya Kumrudia Mungu, kitendo cha kuupinga UOVU wa ushoga, tungali chini ya mamlaka ya Shetani kwa kutenda maovu mengine ni mchezo wa kuigiza. Ushoga ni Dhambi na ni machukizo kwa Mungu, neno la Mungu linasema “Usilale na Mwanamume  mfano wa kulala na Mwanamke; ni machukizo” Mambo ya Walawi 18:22.  Hivyo kufanya Ushoga au kukubaliana na Ushoga ni kujitia chini ya Laana ya Mungu.

WAPENDWA NI WAKATI WA KUUNGANA KUMUOMBA MUNGU ILI ATUPITISHE SALAMA KATIKA HAYA YANAYOUJIA ULIMWENGU

Na: Eliezer Mwangosi.

MAANA YA NENO NAKUPENDA

Ujumbe  unatoka:  1Wakorintho 13:4-6

Upendo …haufurahii udhalimu, bali hufurahi pamoja na kweli.

tAFAKARI:

Neno KUPENDA, au UPENDO, limekuwa msamiati mgumu sana kwa vijana wa leo, shetani amefanikiwa kwa asilimia 90 kuwanasa vijana wengi na kuwaangusha katika dhambi, akitumia msamiati huu NAKUPENDA. Nikiwa katika huduma zangu za Injili, nilikutana na binti mmoja ambaye alikuwa amezidiwa kitandani akiwa anaumwa, lakini pia alikuwa mja mzito. Nilipomuuliza mumewe yuko wapi, akaanza kulia, mwishowe akaeleza kisa cha kusikitisha jinsi kijana wa kiume alivyomdanganya kuwa anampenda, lakini baada kutimiza haja yake, akampiga “KIBUTI” hakutaka hata kumuona, alitelekezwa bila msaada.

Vijana wengi leo hasa wa kike wanaingizwa “CHAKA” wanadanganywa na vijana wa kiume kwa neno NAKUPENDA, Binti akiambiwa nakupenda, utamuona Macho na masikio yanaaza kulege, kusema ukweli wengi HAWAPENDI, bali WANATAMANI. Wengi wamepitia changamoto hiyo ya kuambiwa wanapendwa, lakini baadaye walijikuta hukana Upendo. Na matatizo ya ndoa nyingi za siku hizi yanatokana na mwanzo wa mahusiano kuwa ni kukidhi TAMAA ya mwili. Misukumo na Mihemuko ya Tamaa za NGONO imechukuliwa na Vijana wengi kuwa ni Upendo. Utakuta kijana wa kiume anaonyesha hisia zote za kupenda, yuko tayari kukupigia magoti, kukulamba miguu, kukupatia chochote utakacho, ili mradi akuonyeshe kuwa anakupenda. Kisa cha Amnoni na Tamari katika biblia “1Samweli 13:1-22”, kinaeleza jinsi Amnoni alivyougua kwa kumpenda dada yake Tamari, lakini baada ya Kuzini naye, Mihemuko ya Ngono ilipoisha akamchukia Vibaya sana.

Kuna ujinga ambao shetani ameuhalalisha kwa vijana wa kizazi hiki, kuwa Upendo unadhihirishwa kwa tendo la NGONO, yaani bila kumuonjesha eti utakuwa hujakubali penzi lake, na wengine ukiwanyima eti wanaangua kilio nakusema “Darling mwenzio utaniua aaaaaa” , Mwambie kama kweli unanipenda basi kufa nione, utashangaa macho makavuu! anaendelea kula dagaa. KIJANA ANAYELILIA NGONO KABLA YA NDOA HAKUPENDI ANAKUTAMANI, na jambo la hatari kabisa ni kwamba anakutenganisha na Mungu wako kwa kukuingiza katika Dhambi – Neno linasema “Enyi Wazinzi, hamjui ya kwamba kuwa rafiki wa Dunia ni kuwa ADUI wa Mungu? …” Yakobo 4:4. Iweni na akili, upendo unaokutenga na Mungu wako una faida gani? Ulimwengu utakapokugeuka na Tufani kuvuma juu yako, utamkimbilia nani kama sio Mungu?

Wito wangu kwa vijana wote wanaopenda kuwa na maisha yenye Baraka za mungu ni huu “Basi Mtiini Mungu, Mpingeni Shetani, naye atawakimbia. Mkaribieni Mungu naye atawakaribia ninyi ….” Yakobo 4:7-8. Mungu anahitaji vijana wanaoweza kumwambia Shetani “NO” au “HAPANA”, mpaka lini Shetani ataendelea kutawala maisha ya vijana? It is time to say “NO” and be ready because JESUS is around the corner. Mwisho nawapongeza vijana wote waliotangaza NIA ya kufunga Ndoa halali, na kuachana na Dhambi ya Uzinzi. Nitazidi kuwaombea ili Mungu azidi kuifanikisha mipango yenu.

NEEMA NA UPENDO WA MUNGU BABA UKAWE JUU YENU WOTE NA BARAKA TELE ZIKAAMBANE NANYI. NAWATAKIA WEEK END NJEMA.

Ev:  Eliezer Mwangosi.

0755808077 & 0652571733

Kwa masomo zaidi fungua mitandao ifuatayo: http://emwangosi.blogspot.com/ (Vijana) http://kayanafamilia.blogspot.com/ (Ndoa) http://matengenezo.blogspot.com/ (Ujumbe wa Matengenezo)

JE UMEATHIRIKA NA KUTOTII WAZAZI?

 UJUMBE UNATOKA: Kutoka 20:12

Waheshimu baba yako na mama yako; siku zako zipate kuwa nyingi katika nchi upewayo na Bwana, Mungu wako.

tAFAKARI:

Agizo la kuheshimu wazazi ni kati ya Amri kumi za Mungu, tatizo la watoto na vijana kutowatii wazazi linaendela kuwa sugu kila kunapokucha, si ajabu kusikia mtoto anaporomosha matusi ya Nguoni kwa baba au mama yake, mgeni akifika nyumbani utasikia mama anasema “nyie watoto mpishe mgeni akae” au “Amkia mgeni”, hiyo inaashiria nini? kwenye Mabasi utakuta Mama mja mzito amesimama huku watoto wa shule wamekaa, ni mara ngapi tunaona watoto wanafyonya watu wazima?. Wazazi wamepewa wajibu wa kuwa mawakili wa Mungu hapa duniani, hivyo ni lazima watoto watii na kuheshimu ushauri wa wazazi.

Angalia Mifano ifuatayo ya Vijana waliokaidi Ushauri wa wazazi wao na matokeo yake, kumbuka wazazi sio wale tu waliokuzaa ni watu wote wanaokuzidi Umri na wenye mamlaka juu yako.

1.      Kijana mmoja alikodi vijana wa kihuni kuja kumpiga baba yake, kwa sababu anamkataza kwenda Disko, mzee alivamiwa na kupigwa hadi mauti, hadi leo yule kijana ni kichaa, anayekula kwenye majalala ya taka.

2.      Binti mmoja alikuwa akionywa kuwa ni hatari kukaa faragha (kukaa na mwanaume katika chumba mkiwa wawili, au sehemu ya Giza), hata angekuwa mchumba wako, mtazini tuu. Binti alimuona mama yake amepitwa na wakati, akaamua kwenda kwa rafiki yake wa kiume, bila kutarajia alijikuta amezini, na hapohapo goli likafungwa, bahati mbaya alipomuambia kijana juu ya mimba yake, alimruka futi mia, mwisho wa yote yule dada akaamua kujiua kwa Sumu ya panya.

Kijana! kama umeamua kutozini, usijidanganye kuwa utashinda zinaa katika mazingira ya kukaa wawili chumbani. Uliona wapi wembe usinate kwenye Simaku vikiwa karibu? Au Ukalie jiko la Mkaa usiungue? Mapenzi ni moto mara moja, au umeme “transformer”. Kuna sehemu ambayo ukifika akili inapotea, kwa lugha ya kigeni inaitwa (Point of no Return), usijidanganye, wengi wamejikuta wana ukimwi, waja wazito, wameharibiwa usichana wao bila matarajio, kuishi au kuolewa na mtu asiyemtarajia n.k. kwa sababu ya kutozingatia ushauri huu.

3.      Kufungiwa nira na wasioamini, soma, 2Korintho 6:14-15. Hili ni tatizo sugu katika kizazi chetu, wala msije mkaiga jambo hili, Binti mmoja mkristo aliyekuwa amekaidi ushauri na kuamua kuolewa na Kijana wa Imani tofauti, alikutwa amefariki kwa kuwekewa sumu kwenye chakula, na mke mwenza ambaye hakutaka mume wake amuoe, ila kutokana na Imani ya mumewe kuoa wake wengi ilikuwa ruksa, hivyo akaoa na ndipo ugonvi ukaanza. Tunashuhudia matatizo mengi, ikiwa ni pamoja na kuzuiwa kuabudu kwenye imani yako, watoto kukosa misingi ya Imani, Ndoa haiwi mwili mmoja tena kwa misingi ya Biblia, kwa sababu ya Imani, mwisho ni kujitenga na Mungu.

Mungu akikataza jambo, anamaanisha hivyo, usifanye, ukikaidi Mungu anasema, hata Maombi au sala yako ni CHUKIZO kwake “Yeye agauzaye sikio lake asiisikie sheria, Hata sala yake ni chukizo” Mithali 28:9. Unaweza kusema mbona naomba na ananiskia? Kumbuka hata mwizi anaomba anapoenda kuiba na anarudi salama, unafikiri nani anayejibu maombi? Na mwisho wake ni upi?

Kuna mashauri mengi kwa vijana ambayo tutaendelea kujifunza siku zijazo, ninachowaasa vijana ni kwamba msimjaribu Mungu kwa kufanya mambo aliyokataza, matokeo yake ni maangamizi ya kutisha yanayoujia Ulimwengu. Wale walio tayari wameathirika na kutosikia ushauri, ni wakati wao kumrudia Mungu, atawasamehe ili mradi waamue kuachana na njia za majuto. Waswahili wanasema "Asiyesikia la Mkuu huvunjika Guu" na "Majuto ni Mjukuu". Hebu Bwana atuangazie nuru yake ili tuwe na Amani sasa na hata milele.

NAWATAKIA SIKU NJEMA NA MAPUMZIKO MEMA YA MWISHO WA WIKI

Ev:  Eliezer Mwangosi.

0755808077 & 0652571733

Kwa masomo zaidi fungua mitandao ifuatayo: http://emwangosi.blogspot.com/ (Vijana) http://kayanafamilia.blogspot.com/ (Ndoa) http://matengenezo.blogspot.com/ (Ujumbe wa Matengenezo)

JE UNAWEZAJE KUPATA AMANI MOYONI?

UJUMBE UNATOKA:  ISAYA 48:17-18

Bwana, mkombozi wako, mtakatifu wa Israeli, asema hivi; Mimi ni Bwana, Mungu wako, nikufundishaye ili upate FAIDA, nikuongozaye kwa njia ikupasayo kuifuata. Laiti ungalisikiliza AMRI zangu! Ndipo amani yako ingalikuwa kama mto wa maji, na haki yako kama mawimbi ya bahari.

tAFAKARI:

Siku za hivi karibuni nilimsikia kijana mmoja wa kiume akimwambia mwenzie akisema “Tafakari anayotoa huyu mzee mimi sitaki kuisoma, utafikiri ananisema mimi tu” moyoni nikacheka nikajifanya sijasikia,  na ni wengi wakifungua email zao wakiona tu NENO LA LEO wana “delete” hawataki hata kusoma, na wengine wanasoma ila hawazingatii.  Rafiki yangu kijana, Neno la Mungu ni Upanga unaogawanya Nafsi (Mwili) na Roho, ukiona unasoma neno linakukosoa, na linakuuma moyoni, mshukuru Mungu, hiyo ni sauti Mungu inakuonya, fanya uamuzi wa kutii neno lake. Ibilisi ndiye anayewaongoza watu kuchukia ukweli wa neno la Mungu ili baadaye awatese na hatimaye kuwaua kifo kibaya. Wewe mwenyewe ni shahidi ni faida gani umeipata kwa dhambi uliyoitenda? Ni kujilisha UPEPO usio na faida.

Katika tafiti zilizofanyika; Changamoto kubwa zinazowakibili vijana ni maswala ya Mahusiano yaani; Marafiki (Mapenzi), Uchumba na Ndoa. Swala hili la Mahusiano katika kizazi chetu cha sasa limekuwa na sula tofauti, zamani mtu akiingia kwenye mahusiano ilikuwa ni Baraka ya kudumu katika maisha, lakini siku hizi mambo yamegeuka, kijana akijiingiza kwenye mahusiano ni sawa na kubeba Bomu la Nuclear ambalo kila wakati anakaa kwa tahadhari hajui litapasuka lini. Vilio, Kuvunjika moyo, kukata tama, kuchanganyikiwa, kujiua, kujijutia, manung’uniko, makelele, magonvi, dhuluma, kuoneana, kuachana Solemba n.k. ndiyo sehemu ya maisha. Hata wanaofunga ndoa siku hizi, furaha zao ni za kitambo tu, baada ya hapo ni Majuto, kwa sababu mwanzilishi wa mahusiano yao ni Ibilisi aliyewaongoza kukidhi tama za miili yao, sio upendo wa Mungu.

Jambo la pili ni Ugumu wa Maisha, yaani kupata pesa za kutosha kupata mahitaji mfano. Kununua gari, kustarehe, kulipa pango, kujenga, kula, kuvaa, kulipa ada ya chuo n.k. Siku hizi kuna Majimama (Sugar Mumy) wenye pesa, vijana hawaoni wala kusikia, hata kama wanaogelea mabwawa marefu ya majimama, hawaangalii ili mradi mkono uingie kinywani, ikitokea wameoa vijana wenzao inakuwa ni usumbufu tu usiokoma. Hatuwasahau Majibaba wanaoitwa Mapedeshee, Mabuzi au ma ATM n.k. Vijana wa kike kutokana na maisha kuwa magumu wameamua kubeba hata mizigo isiyostahili yao. Binti mmoja alifiwa na Mwanaume kifuani akiwa anavunja Amri ya Uzinzi guest house, Kumbe buzi lenyewe gari lake ni afadhali gari la Mkaa, haliwaki mpaka uskume (kwa booster za kimasai).  Binti akiolewa na kijana naye inakuwa ni taabu, make alizoea kuendesha Magari ya Mizigo, halafu anajikuta anaendesha Bajaji au gari aina ya Epsi.

Vijana sio waaminifu kabisa, anakuwa na Wachumba, anakuwa na ATMs, na anakuwa na watu wa kula nao BATA. Hivi unategemea ndoa itakuwa na sura gani? Vijana! Katika tafakari ya leo, Mungu anasema “Mimi ni Bwana Mungu wako nikufundishaye ili upate FAIDA, Laiti ungelisikiliza AMRI zake, ndipo AMANI yako ingalikuwa kama mto wa MAJI na HAKI yako kama mawimbi ya Bahari”. Kijana unataka AMANI moyoni? Unataka FAIDA au Mafanikio katika mambo yako? Geuka sasa, mtazame Yesu Kristo, yatosha kumtumikia Shetani kwa maisha ya dhambi. Neema ya Yesu ipo kukuokoa na kukupatia Ushindi wa Dhambi.

MUNGU WA AMANI AWAPATIE SIKU NJEMA YENYE BARAKA TELE.

Ev:  Eliezer Mwangosi.

0755808077 & 0652571733